السبت، 24 مايو 2014

الدنيا بخير

دخلت هالبيت من سنين 
وطلعت منه على يد من دخلني اياه 
كان عمري ١٢ سنه   والحين عمري٢٤

اذكر يوم مسح. على راسي واخذني بيدي   وابوي واقف. يناظرنا 



بكا وصراخ وصوت تكسسسسير 
يا ابو ساره  وش هالصراخ.قم شف عيالك وش جاري عليهم
تنهد ابو ساره   ودخل وهو متأكد ان زوجته. تضرب بنته   دخل وبعصبيه مهزوزه.  اتركي البنيه بتموتينها 
صرخت بغل وهي تشد شعرها بقوووه وبدون رحمه لين تمزع بيدها.
 : لييييته ليتها تموت وافتك من وجهها النحس بنت المنحوسه 
ابو ساره يالله فك بنته من بين يد زوجته الغوله 
اتركيها الله ياخذس 
صرخت عليه بقووه : ولا بعد تدعي علي. شف. يا انا يابنتك بهذي الخرابه 
ماعاد اقدر. اتحمل وجودها
يوم اشوفها. تطير الجنون براسي احس ودي. اذبحها 
معك لين بكرره. انا والا هي 



نكس راسه مايقدر يعصي لها امر
 اخذها معه للمجلس اللي فيه ابو هادي 
وهي تبكي ودموعها تحرقها وشعرهامتطاير ومحتاس.  



اليوم رجعت من المدرسه وانا طايره من الوناسه اليوم ابلا بدريه  سوت لي ظفيره فرنسيه.  رحمتني ورتبت لي شعري المنكوش  وربطت لي  جديلتي ببكله حلوه وعطرتني  ومسحت على راسي برحمه
ومدت لي كيس مليان حلويات.
ناظرت معلمتي  بإمتنان. : ابلا هذا. كله لي
ابلا بدريه : اي حبيبتي  كله لك
رجا  ابلا انا احبس وحضنتها قوووه. احس انها امي. 
هالذكرى عالقه بذهني لايمكن تروح 
 ويوميا كانت تسألني عن حالي  وتحاول  وتغير من نفسيتي وهذا اليوم كان اسعد يوم لي. لين رحت البيت. 



ودخلت وشافتني  مرت ابوي
 مرتبه ومبسوطه والفرحه بعيوني
مسكت شنطتي المهتريه وحضنتها بقوه. وهالحركه لفتت نظرها وعرفت اني مخبيه حاجه بالشنطه 
  ثارت وبدت تفتش بالشنطه 
منعتها. صفقتني ورفستني لين اخذت اللي بشنطتي   اخذت كيس الحلويات هجمت عليها. وصرخت. هذا حقي هاتييه
مسكتني مع شعري بغل وصارت تظرب فيني. وتشد بقووه شعريلين دخل ابوي وفكتي من يدها بالغصب 
   وحطت يدها تتحسس جلدة راسهابألم شديد عسى يدها للقطع
الله ياخذها 


 


٣
سأل ابو هادي اللي كان جاي ياخذ الاجار. 
وش فيه وشبها بنتك 
رد ابو رجا  بعبره مخنوقه   حسبي الله 
والله مدري وش اقول يا ابو هادي.   
المره ذبحت بنتي
واخرتها خيرتني بينها وبين بنتي
واخاف  تتركني وتاخذ عيالي الصغار معها 
تأثر ابو هادي. : لا حول ولا قوة الا بالله 
قال ابو رجا  : يابو هادي وش رايك ازوجك رجا خذها ومهرها اجار هالبيت  

ابو هادي تبلم ماعرف وش يرد.  

قال ابو رجا :خذها ترى بتاخذ اجري واجرها والله ماتندم 
قال ابوهادي يابن الحلال. انامتزوج وعندي ثلاث حريم والرابعه متوفيه قريب حرام عليك بنتك 
قال ابو رجا:  خلاص تراها جتك عطيه مامن وراها جزيه
 تعال بعد المغرب وتملك وتاخذها معك 





٤
راح ابو هادي لبيته  والهم كاسيه
 دخل على ام هادي اوسط حريمه واعقلهن وام ولده الوحيد  تعالي يام هادي عندي لتس سالفه

وقالها اللي صار في بيت ابو رجا 

مسكت راسها ام هادي منصابه ومتوجعه من اللي قاله بيجيب لها ضره فوق ضرايرها. وماهي اي ضرره     ضره صغيره بالعمر 
سكتت مافي اي كلام ممكن يوصف وجعها واحساسها كل مرره بتكون اوجع واوجع.  مهما كان زواج زوجها عليها بمرارة العلقم 



 
دخل ابورجا  على زوجته  وداد  وقفت له متخصره :وش  صار معك  
صد عنها واحتضن كتوف بنته رجا
 يكلمها. : روحي يا يمه جهزي شنطتس 
قالت رجا  بعيون دامعه : اي شنطه يبه 
:رد وفيه غصة قهر :شنطة المدرسه وخذي كل اغراضس وملابستس 
وانتظريني في المجلس 
ردت بهمس : طيب يبه 



واقفه تراقبهم وبعيونها فرحه وشماته في رجا وابوها عارفه ومتأكده انه لا يمكن يفرط فيها. دام عياله الصغار متعلقين فيها وهو روحه بعياله 
قالت : وين بتقلعها 
رد بإنكسار : زوجتها لابو هادي. صاحب البيت 

وغداً نلتقي ان شاء الله   بإنتظار تعليقاتكم 










٥
اذن المغرب وصلو الناس وابو هادي ما جا والشيخ من بعد صلاة المغرب وهو جالس مع ابو رجا ينتظرون  
 
جالسه برى المجلس في الممر مابين الصاله والمجلس.
مرة ابوي مانعتني ادخل  صكتت الباب بالمفتاح 
وابوي جالس مع الشيخ ينتظرون واسمع الشيخ يقول لابوي شكل العريس ماهو بجاي
 رد عليه ابوي بيجي. وان ماجا جبت عريسً غيره الليله مزوجها مزوجها ان شالله 





سمعت كلام ابوي   يبي الفكه مني. بانر من. حرمته الظالمه  حسبي الله عليها
تذكرت ان ماذاكرت. واجباتي
فتحت شنطتي وطلعت كتابي وقمت احل. واجب القواعد ^^ولهيت عن الدنيا ومافيها




٦
وقفت ام هنا على باب الصاله قال هالحين انتي من عقلس تتكلمين يا ام هادي
ردت عليها ام ساره :ياااربييه ام هادي هالحين وش قالت الا الي قاله ابو هادي 
خلاص  مايقدر الرجال الا يملى الخانه الفاضيه ويجيب الرابعه
قالت ام هادي   : لا رجع ابو هادي بتشوفن والحين يالله فكني وروحن لغرفكن
زعلن وضاقت صدورهن 
من زواجة ابو هادي المفاجئه وبدت  النفوس تنشحن بالحقد والغل على الزوجه الجديده



رحت لبيت ابو رجا اقدم رجل واخر الثانيه. 
والله مالي في هالزواجه من خاطر 
لكن كل مايطرى في بالي الذيبه مرته ومنظر بنيته وهي تبكي ومتورمه من الظرب   تدب الرحمه فيني
وصلت لقيت الرجال ينتظرني ومعه ثنين من جيرانه والشيخ. 
سلمت وهو ماصدق على طول طلب من الشيخ يملك 
تمت الملكه وطلع الشيخ والشهود
قام ابو رجا وغاب دقيقه بعدها دخل علي. وبنته معه   ماسكها من يدها 
ووقف قدامي وحط يد بنيته في يدي 
هاذي عروسك يابو هادي  منك المال ومنها العيال وبالمبارك عليك 






٧
مدري وش اقول. هذي بعمر بنتي هنا والا بنتي ندى   انا اكبر من ابوها. بكثيررر
بس. الله لا ينزع الرحمه من قلوبنا. 

مسكت يدها وقلت بنتك بالحفظ والصون   وطلعت مافي كلام ينقال 
جت معي وعينها منكسره ودمعتهامتعلقه برمشها صدت عن ابوها ولا ألتفتت له 
وهو يبكي ويقولها سامحيني يابنتي على عيني والله فراقتس


وصلنا لبيت ابو هادي. كان ساكت طول الطريق مافي صوت الا صوت المطر اللي يظرب بالقزاز 
نزلت من السياره بعد ماقالي انزلي يا بنتي 
ودخلت معه بيت ماعرف من فيه ولا ادري وش بشوف لا كيف بعيش 
  







٨
 من دخلت حسيت هذا البيت فيه حياه 
بيت له روح. 
بيت مليان ناس
تراكظن مجموعه من البنات لابوهادي 
بمختلف الاعمار كبار وصغار يناظروني ويتهامسون شوي  وشوي يضحكون.  
وانا انزل نظري وارجع ارفعه فيهن 
شوفي شعرها. هههههه
شوفي. ثوبها
ههههههه.
لا لا شوفي. صندلهاههههه
خجلت. من. شكلي. ولبسي. 
عدلت بشعري. واحااول اخفي صندلي
  وهم يتضاحكون علي  







*******
اجتمعنا بأمر من ابوي كلنا حريم ابوي الثلاث وخواتي واخوي هادي   
كلناعيوننا معلقه بحرمة ابوي الجديده اللي دخلت علينا معه 
عمرها بعمر خواتي هنا وندى
 بس شكلها اصغر نحيفه وسمرا ملابسها مبهدله وحالتها حاله محتضنه شنطه قديمه. ومنزله راسها وجالسه بجنب ابوي 




قال ابوي :اسمعن كلكن.يا حريم ويا بنات
 هذي ومسح على راس رجا 
:هذي رجا صحيح اني تزوجتها لكن يشهد الله علي انها. بنت من بناتي. 
وناظر في زوجاته  : ابيكن.تعاملهن مثل بناتكن وازود
 وتاخذن اجر في هاليتيمه 
والتفت لبناته:وانتن يابناتي ترى. رجا اختكن  ومن بكره بتروح معاكم للمدرسه
 الله الله باختكن وابي اسمع العلوم الطيبه

بعدها وجه الكلام لي
:صالحه يابنتي الله يرضى عليتس
  خذيها وتولي امرها واي شي ينقص عليها   بلغيني 

غدا لنا لقاء ان شالله.  



٩ 
اخذتني من يدي. اكبر بنات ابو هادي. وعمرها ذيك الايام يمكن ثلاثين ارمله وعايشه مع  بنتها الصغيره في بيت ابوها 
اخذتني وتولت امري كأنها امي
كانت مررره حنونه  صرت انام في غرفتها هي وخواتها 
كان بيت الدفى بيتهم
 ناكل جميع وننام جميع ونسولف جميع 
والمدرسه نروحها بالباص
حريم ابو هادي بعد من ضمنن اني مجرد يتيمه كفلها ابو هادي وهن يعاملني احسن معامله 
هادي ولد ابو هادي كان في اول متوسط. مشروع رجال ناجح
 ربي طرح البركه فيه لابوه وامه وخواته



ماكنت اطلب او اتمنى شي الا ويتحقق لي 
نسيت ايام الاسى في بيت ابوي هو نساني. وانا نسيته 




١٠
لين مرره دخل علي ابو هادي وكنت في ثالث متوسط 
 وكانت ملامحه حزينه كان مترددفي الكلام الى ان قالي: ابوتس يطلبتس الحل ومرة ابوتستبي تشوفتس
شهقت ابوي مااات. 
سألت ابو هادي : وانا ابكي متى ووشلون
قالي :صار عليهم حادث وتوفى ابوتس واخوانتس ومرة ابوتس بالمستشفى ولازم تروحين لها
هزيت راسي رافضه  ما ابيها ولا ابي اشوفها 
دخلت صالحه. : عظم الله اجرس يا قلبي ولازم تكونين معاها في هاللحظه 
رفضت وبشده. : لا لا يمكن 
بكيت بإنهيار وانا اردد ما ابي اشوفها ماااااأبي

تركوني لحالي لين هديت
 وبعدها رجعت لي صالحه. : تدرين انا
 بروح لها واتشكرها 
ناظرت فيها متعجبه : وش تشكرينها عليه
تبسمت صالحه: الحين لو هي ما نكدت عليس
حياتس وابوتس  زوجس ابوي
كان ماعرفناس ولا عرفتيني
 وانا بشكرها لان انتي يا رجا مكسب لنا اختنا وصديقتنا وبنتنا  بعد 
تبسمت ممنونه لصالحه واهلها 
: قالت ؛ ها يا رجا بتروحين لها
وانا تراني معس بروح لازم اتشكرها واعلمها هي وش خسرت يوم حنا كسبناتس

قلت:طيب بس ماراح نطول عندها


ورحنا نزور وداد زوجة ابوي الله يرحمه
 وكانت مرره تعبانه. ومن شافتني عرفتني. 
همست بصوت متحشرج. سامحيني حلليني يا رجا. وسامحي ابوتس 


ماتحملت منظرها وكلامها  هربت برى الغرفه ولحقتني صالحه.  ورجعتني بعد ما. حلفتني اني. اسامحها 
اي. سامحتها. وسامحت ابوي
وبعدها طلعت من المستشفى مع صالحه. لبيتي. بيت اهلي وخواتي. 

١١
مرت السنين وتخرجت انا وبنات ابو هادي واليوم محتفلين بتخرجنا مجتمعين كلنا في الاستراحه 
الجميع متواجد خوال وخالات واعمامهم وعماتهم كلهم متواجدين كانت عزومه كبيره.   
كنت واقفه بالمدخل توني واصله
تأخرت انا وصالحه بعد ما اخذنا  اغراض  وحلويات
 صالحه دخلت مستعجله  وانا تعثرت بعباتي وطحت على وجهي 
قمت ونفضت عباتي  والا اسمع ضحك 
واناظر وواشوف واحد سخيف واقف وميت ضحك علي 
تغطيت ورحت اعرج لداخل عند الحريم بس بعد ما دعيت عليه ضحكت بلاسنون  قل اميين 





١٢
دخلت وانا مقهوره من الزفت اللي طحت قدامه
وألقى ندى قدامي   
:سلامات سلامات وش فيس تعرجين
قلت لها :تعثرت عند الباب وطحت على ركبتي
قالت :ياقلبي    وناظرت. بركبتي   الحمد لله جايبه  معي شنطة اسعافات وراحت. 
نزلت عباتي   وجلست افرك ركبتي يمكن يخف الوجع 
فجأه حسيت احد يناظرني 
وارفع راسي واشوف الرجال اللي واقف ويناظرني ويضحك 
قال:هههههههه سلامات  واعذريني بصراحه شكلس يضحك 
مسكت عباتي وتغطيت فيها
قال مستغرب  :يابنت ماعرفتيني انا محمد 
اي البنات انتي??

ركظت ندى وقالت  : وراك يا محمد 

ماهي من خواتي



غداً نلتقي ان شالله





١٣ 

طلعت متفشل  بعد ما طردتني ندى
كل تفكيري انها بنت من بنات عمي او عماتي وبما اني محرم لهن بحكم ان جدتي ام ابوي مرضعتي فانا عمهن بالرضاعه واخبرهن صغار.  اخر مره شفتهن. بس هذي اكيد 
اكيد من انسبانا
  يافشيله  


١٤
 
 دايم في اجتماعات العايله ما احب اروح  
تضايقني نظرات الشفقه والفضول
والا نظرات الكره والا نظرات الخوف 
كأني خطافة رجال   كنت اعتزل اجتماعاتهم
اريح حل لقيته 
 بس الليله كانت جميله  وانبسطت معهم
بس كل ما اذكر السخيف اللي ضحك علي 
يعكر مزاجي 
بعد ما عرفت انه ولد اخو ابو هادي

١٥
مرت سنه
وفي يوم صار اجتماع للاعمام 
في بيتنا 

بعدها ناداني ابو هادي وبحضور صالحه
قالي يابنتي يشهد الله علي من دخلتي بيتي والبركه حلت فيه 
واحلى الايام كانت بوجودس
لكن انتي يابنتي كبرتي ولابد تشوفين نصيبس
واليوم جا من يخطبس مني. 
وانا وافقت 
استحيت منه مرررره
 انتظر مني رد. بس ماعندي رد  
قالت صالحه: يبه علمها منهو العريس 
قال ابو هادي : ولد اخوي   محمد 
ان وافقتي تممنا الموضوع
 واكيد لازم اطلقتس حتى تتم امورس 

/عرفته محمد اللي ظحك علي يوم الاستراحه
قلت له: ياعمي  خلني استخير وارد لك بكره ان شالله



النهايه 


اليوم زواجي من محمد 

من خمس شهور طلقني ابو هادي الله يجزاه الجنه   يوم انتهت عدتي
ملكني لمحمد 
ماقصر  رباني تكفل بي وزوجني وفرح لي كأني بنت من بناته 






القصه حقيقيه بس انا كتبتها بأسلوبي  
ولازال بالدنيا خير دام فيها ناس مثل ابو هادي 

هناك تعليق واحد: