الخميس، 1 مايو 2014

ايامنا الحلوة 18

الجزء الثامن عشر
===========

فهد
دخل البيت وهو فاضي
كان متوقعهم موجودين
بس للاسف مارجعوا
كان بيموت من الوحده البيت كبييير وموحش
ندم كثيير انه ماراح معهم
اكيد انهم مبسوطين والا كان رجعوو

واكييد الحين هند محد قدها
عايشه احلى لحظات عمرها مع اختها
عض على شفته
آخ يا اختها اللي حرمت عيوني النوم
خلي وضعها مع ابوها يستقر
ان شاء الله اخطبها
وتكون لي يااااارب
اوووووووووووه خليني اضبط اموري عشان لا خطبتها اكون جاهز
اول شي بسويه ببني لي بيت مكان بيت اهلي الطين
وسرح فكره مع البيت اللي بيجمعه مع طفله لا تزوجها



***********************************

ابو مساعد واقف وينتظر طفله تدخل عليهم
مساعد: يبه اجلس
ابو مساعد : ما اقدر يابوك ما اقدر
مساعد : يبه انت تعبان اجلس ريح شوي
ابو مساعد : هي متى بتجي
مساعد : هالحيين امي مزنه قالت انها نازله وراها
ما خلص مساعد كلامه الا والباب انفتح ودخلت طفله
فز واقف ابو مساعد راح لها
طفله دخلت وهي مبتسمه من كلامها مع وضحى
بس لما دخلت كشت ووتجمدت بمكانها
مستحيه ومحرجه ناظرت بخجل نظره سريعه
على المكان شافت ابوها مقبل عليها ويرحب ويهلي
ابو مساعد: هلا والله ببنتي ومسكها وحظنها
وسلم على راسها وهي كشت وحاولت توخرمن حظنه
بس هو شد عليها وقوى من حظنته لها وقعد يصيح
: سامحيني يا بنت الغاليه سامحيني
وهي حست بالغصه شعوور كريه
لمن تشوف رجال كبير يبكي
شلون لاصار ابوك
عجزت طفله عن الكلاام
حاسه بالغصه
ودموعها متحجره بعيونها
ابومساعد يصيح: والله يابنتي مالي عذر
مالي عذر تكفين يابوتس اعفي وسامحي

مساعد قرب من ابوه ولمه
وصارت طفله بينهم منظر
عجييب ومساعد محتوي ابوه وابوه محتوي طفله
مساعد: يبه الله يخليك لي تكفى بلاها
دموعك تراها غاليه
ابومساعد يدف مساعد بمرح : وخر عني انا وبنتي
مساعد برووح حلوة : وش اسوي انت
استوليت عليها وانا بعد ابي احظن اختي
قلت مافيه احظنكم انتم الاثنين
طفله ميته حرررج من اللي صااار
ولازالت مدنقه راسها
راسها بيطبق على صدرها من كثر ماهي منزلته

مساعد سحب طفله من ابوه
وحظنها وحب راسها : اخيرا شفناتس
يابنت امي وابوي
طفله : منكمشه ومستحيه من مساعد

بادي كان جالس ويتعبر ويتغصص
ودموعه تسيل على خده
وكل شوي يمسحها بكمه
شايف ابو مساعد وتأثره
ومساعد وفرحته
وطفله وحرجها وحب يخفف على بنته
قال لمساعد :خفو على بنتي ترى ما عرفت غير حضيني
وقام وحضنها
وهي تعلقت بابوها وصارت تبكي
بصوت مسموع
وهو يهديها ويمسح على راسها
اخذها لزاوية المقلط وجلسها جنبه
وقال : بس يمه خلااص ادري انتس مستحيه
وانه صعب عليتس
مساعد: ياااااالله يا طفله مستحيه مننا !!
يالله بكره ندبل كبدتس وتدبلين كبودنا
ابومساعد ساااكت كان يتأملها ودموعه تسيييل
يالله تشبه امها الخالق الناطق يالله
نفس العيون الوسااع
نفس الخشم الصغييير
تقاسيم وجهها هي نفسها
ما خلت من امها شي حتى الزوول زول امها
طفله رفعت نظرها على الموجودين وجت عينها بعين ابوها
وشافت دموعه ودها تسأل ليش الدموووع مو انت اللي تخليت عني ليشش؟؟؟؟؟


وهم على هذا الوضع دخل عليهم ماجد
وسلم على طفله بحب وموده
وقال بمزح :اخيرا صار عندنا بنت غير هند العله
مساعد بضحكه : ياويللك لو تسمعك
ماجد: خلها تسمع ما همتني النمله
مساعد : هههههه يعني اعلمها طييييب الله يعينك
اجل على رجتها وازعاجها
طفله تبسمت غصب عنها وتخيلت هند لو سمعتهم وش بتسوي
ابو مساعد بضحكه خفيفه : اها ترى ما ارضى على بنتي



* * *



بعد شوي اندق باب المقلط من جهت صالة البيت
وقامت طفله تشوف مين
طفله طلعت لقت وضحى جايبه صينية القهوة
وضحى وهي تلاعب حاجبها : هااا بشري
كيف كان اللقاء يا اخيه
طفله كان خشمها احمر وعيونها منفخات ضحكت :
كان اللقاء عاطفي جدا وذرفنا الكثييير من الدمووع
وضحى تناول طفله صينية القهوة
: اسمعي تراني ابي تفاصيل التفاصيل
سمعتي كل شي قلتوووه والا حركه سويتوها
طفله : أي طيب طيب يله اذلفي خليني افتح الباب
وضحى : لااا والله انا وضحى تقولين لي اذلفي
وناظرت فيها من فوووق لتحت : هزلت
طفله : روووحي بعيد عن البااب يا خبله
وضحى : شوفي مو تروحين البيت ما مريتي علي سمعتي
عندي شي مهم بقوله لتس
طفله عطتها ظربه على ساقها : روووحي تراني بفتح الباب
وضحى : اي اي يا .... عورتيني خلااااص رايحه ما ينمزح معتس





لازالو جالسين وكان ابو مساعد يحاول يقنع بادي بالانتقال معهم
وبادي رافض وقالهم : انا ما تزحزح من بيتي ابد وطفله بنتكم
وما اقدر امنعها منكم ورفع عيونه لها
وهي تراها تسمعني
طفله حطت راسها على كتف بادي
وببكاء مرير : يبه انا معك والله ما اخليك
يبه ما ابي شي من الدنيا وانت منت بحولي
مساعد : طفله انتي عايشه مع خالي ببيت مايصلح للسكن
وما ارضى انتس تكملين فيه
بادي حس بالانكسار
مساعد كمل : خالي اسمحلي حتى انت والله ما ارضاه لك
طفله : بصوت باكي وحاد : هالبيت اللي مو عاجبك عشت فيه طول عمري
عشت فيه مع ابوي بادي
وماراح اطلع منه الا انا وابوي بادي فهمتو مستحيل
ارووح معكم مستحيل اخلي ابوي
ابو مساعد : هدي هدي يا حبيبتي هدي
والله مالتس الا اللي يرضيتس
وش تبين انت آمري
مساعد عصب : يبه الله يرحم والدينك وش تقول
ابو مساعد بعصبيه : اششش انا خلااص عطيتها كلمتي
ومستحيل اتراجع عنها
وناظر بطفله بحنيه : يبنتي كانتس تبين تجلسين مع بادي خلااص
بس عندي طلب وارجو انتس ما ترديني يمه
طفله خجلاانه منه ومن مساعد انها رفعت صوتها قبل شوي
بس كان لازم تكون حازمه بذا الموضوع
عشان يوافقون انها تجلس مع ابوها بادي
طفله : سم امرني يبه قالتها بهمس وبتردد
بس سمعها ابو مساعد بقلبه قبل اذنه
وحس ان الدنيا ماتوسعه من الفرحه
: سم الله عدوينتس
ابي تجون معنا كم يوم وابي كل اسبوع
يانتم عندنا او حنا نجيكم
طفله اذا ابوي بادي موافق انا ماعند ي مانع
ابومساعد : بادي ماهو بقايل شي صح يا اخوي
بادي ارتاح من نتيجة الجلسه
وبان بوجهه وحس بالامتنان لابو مساعد
انه خلى طفله عنده
رد على ابو مساعد : والله ان كان تودونا وترجعونا
ما نقول لااا ابد
ابو مساعد : ماعليك محفول مكفول
انا ومساعد جاهزيين نوديكم ونجيبكم
اذن العشا معلن عن نهاية الجلسه
راحو الرجال للمسجد ودخلت طفله داخل




************

في المطبخ

ام محمد واقفه تحط اللمسات النهائيه على العشا
واشواق تقطع السلطه و و شيهانه ومنيره يجهزون السفره
دخلت عليهم طفله : خالتي ام محمد تبين اساعدتس بشي
ام محمد تبتسم لها : شكرا يمه خلصنا
بشريني شفتي ابوتس
طفله: ايه ياخالتي
ام محمد: وعسى امورتس كلها بخير وارتحتي يمه
طفله براحه :اي ياخالتي الحمد لله
اقبلت عليها هند
وضمتها بقوووه: ياعمري يا ختي
طفله تردلها الضمه :هههههه يا قلب اختتس انتي
وضحى واقفه وراهن : ماشاء الله الله يديم بينكن المحبه
وجرت معها طفله : تعالي ابيتس
هندبمزح: هي انتي قد الحركه ذي ؟؟
وضحى طيرت عيونها بهند :ايه قدها ونص وش عندس
هند سوت نفسها خايفه : هههه ما عندي شي خلاااص خوذي
اختي ولو بغيتي خذي امي بعد
طفله :يااخوافه
هند وهي رايح لمجلس الحريم من خاف سلم ووضحى
تخوف بلد بكبره ومدت لسانها عليهم ودخلت

وضحى : اختتس ذي تحفه تجنن
طفله بحب: اي والله موتتني ضحك يوم كنت عندهم
وضحى : ايييه تعالي الله نطقتس
ترى للحيين ما قلتي لي ووش سويتي يوم رحتي لهم
بس اول خلينا نطلع للسطح عشان ناخذ راحتنا

***********

في السطح كانت جلسه غييير
جلسة بوح وصراحه بين الصديقات

طفله : تصدقين خال هند فهد
مرتيين شافني !!
وضحى: شهقت مرتين
طفله: هههه وبنفس اليوم
وضحى: شلون
طفله :المره الاولى كنت انا وهند بنطلع المزرعه
مادرينا الاوهو بوجهنا انا كنت لابسه عباتي بس كاشفه وجهي
وضحى : وش يبي هو ووجهه موتقولين غرفته برى البيت
طفله تبسمت : مسكيين تقولي هند كان بيروح غرفته فوق بيجيب
له كتاب يقرااه مايقدرينام الا وكتابه بيده
وضحى: ماشاء الله مثقف
طفله : شكله كذا
وضحى بفضووول : والمرره الثانيه
طفله : وحمر ووجهها من الفشيله : المره الثانيه كانت العصر
وشافني كذا زي مايقولون على الهوا مباشرة(ن)
وضحى بذهووول : شلللون
اناكنت ابي اتروش وطلعتني هند لحمام غرفتها
وقالت لي مافيه احد خوذي راحتتس
وانا دخلت وما عندي من الشيطان طاري وخلصت ولبست
ماادريت الاوالباب يدق بقوة و اللي برى يحااول يفتحه
وضحى رافعه حواجبها استغراب : من؟؟ لاايكون هو ؟؟
طفله وتتبسم من الذكرى
وتهز راسها : اي هو ذ
فتحت الباب والا المنشفه تنسحب
من على راسي وينكب فوق راسي طشت مويه بااارد على كيف كيفتس
وضحى: هههههههههههههههه هههههههههههه اووووووههههه
اي يابطني خخخخ
وش عنده الاخ روشتس مره ثانيه
طفله: هههههه انت بس لو شفتي وجهه يااحرام تفاجأ فيني
وتصنم وبعدين تأسف وحط المنشفه على راسي وهج الضعيف
وضحى :ههههه لااا ضعيف!!!
والله وطحتي ياطفله وما احد سمى عليتس
طفله ظربتها على كتفها : وجع يا قليلة الادب
وضحى : اي والله الحين يكب عليس المويه ليه ؟؟
وانتي تقوليين ضعيف اقول تراتس منتهيه يالخبله
طفله : الشرهه مو عليتس على اللي يقولتس سالفه
وقامت بتنزل
وضحى : تمسك يدها : لا لا لا لا خلااص توبه اجلسي لا تسيرين بايخه
طفله : اجل يا ويلتس تعلقين علي وتتخيلين شي على كيفتس
وضحى : حااااضر
اسمعي يله قولي لي وش سويتي يوم دخلتي على ابوتس واخوانتس
طفله بمشاعر ملخبطه :ممممم اول مادخلت
وشفتهم يناظروني نزلت راسي خوووف وحيا
ومادريت الا ابوي ابو مساعد يضمني ويصيح ويتأسف والله ياوضحى
موقف ما تمناه لاحد صعب تسمعين رجال يبكي مثل الصغار
قلبي عورني عليه
وضحى : اي والله وعسى سامحتيه
طفله : مدري بس ودي اعرف ليش ما رباني
وضحى :سامحي بعدين يحلها الحلال
طفله : من يوم ضمني اليوم وبكى فوق راسي
وانا مسامحه بس اهم شي يتم كلامه واني اقعد مع ابوي بادي
وضحى :كملي وبعد ما قعد يبكي ويتأسف
طفله : جى مساعد وحضنا انا وابوي وقعد ينكت ويضحك
ابوي

ووضحى قلبها بدى يتراقص على طاري مساعد : يا حليله
اخوتس يبي يخفف عليكم الموقف
طفله طارت عيونها : منهو اللي يا حليله
وضحى بضحكه وحيا: هههه يعني مين اخوتس مساعد
طفله بشهقه : من متى ؟؟
وضحى بتساؤل : وشو اللي من متى ؟؟
طفله بضحكه وتغمز لوضحى : الرضا على مساعد !!
وضحى : من اول مررره شفته
طفله شرقت وقامت تكح : كح كح
وضحى : يووووه طفله والله ترى ما علمتس على شي كان بتسوين كذا
طفله وتاخذ نفس تهدي من الكحه : بالله انتي صادقه
وضحى بابتسامه خجوله تهز راسها ايه
طفله وهي تضحك: قولي لي يالله وش اللي خلاتس تصرحيين بمشاعرتس
وضحى يختي يوم صار اللي صار بالبر ووقفته مع اخوي محمد
وفزعته وشهامته خلتني


اممم مدري شقول بس بصراحه اول لا شفته
اتنرفز ومدري شيجيني بس يوم كنا بالمستشفى صار موقف
غير من نظرتي له او يمكن عدل من نظرتي له
طفله حطت يدها على قلبها : ياااعيني وش هالموقف اللي قلب كيانتس
وضحى : بعد ما طلعونا من غرفة محمد وكنت توني مزعقه على مساعد
طفله تنهدت : ايه كملي
طلعنا برى ووقفت وانا اتنافض من البرد والخو ف والقلق
جى هو سألني عن رقم اهلي
وانا عطيته الرقم وبان بصوتي رجفه
وقبل لا يروح يتصل نزل جاكيته وحطه بيدي
طفله : هيييييئ ايش ؟؟
وضحى : تصدقين انه حطه بيدي من غير ما يلمسني حطه ورااح
انا كان قلبي بيوقف من جراءته وبنفس الوقت حسيت بشعور حلللو
بس كان زعلي منه ومن جراءته اكبر لدرجة اني فرشته بعد شوي وجلست عليه
كعقاب له لا جى يشوف جاكيته بالأرض وانا مالبسته
طفله : وليه يا شاطره تسوين كذا
وضحى : مدري شي غصبن عني
وضحى بحرج وبصعوبه نطقت : تدرين ان الجاكيت للان عندي
طفله : بالله يا جرائتتس !!!!
وضحى يختي يوم طلعنا من المستشفى اخذته معي وعلى اساس
احطه على سيارته بس ما قدرت
وطفله : وينه هالحين
وضحى :عندي بالدولاب
طفله : ما انتي ناويه ترجعينه
وضحى: الا بس شلون
طفله : هاتيه انا اعطيه اياه
وضحى :طيب يله ننزل ونروح للغرفه عشان تشوفينه

طفله :انتي روحي جييبيه وانا بنزل تحت بشرب مويه وارجع لتس
دخلت وضحى الغرفه وفتحت الدولاب وطلعت كيس وفتحته
وطلعت جاكيت مساعد وضمته على صدرها وتنشقت ريحته
وبقلبها ( وه يازين ريحتك زيناه ))
و طلعت من الغرفه الا هند بوجهها
هند : وين طفله
وضحى ارتبكت لان عين هند على الجاكيت ردت : ااطفله تحت راحت تشرب مويه
هند بلقافه : هذا ما كأنه جاكيت مساعد
وضحى مغصها بطنها : اااا مدري كان مع طفله ونسته
وحبيت ارجعه لها
هند مشت عليها وصدقت اللي قالته وضحى
هند: لااخلاص هاتيه انا اوديه له
**************

ليست هناك تعليقات:

إرسال تعليق